ටයර් කියන්නෙ නිතර අවධානය යොමු නොවෙන නමුත් වාහනයේ ඉතාම වැදගත් උපාංගයක්. නියමාකාරයෙන් නඩත්තු නොකලොත් වාහනයක නඩත්තු වියදමෙන්, වැඩිම වියදමක් යන උපාංගය ලෙස ටයර් හඳුන්වාදෙන්න පුළුවන්. ටයරයේ ප්‍රධාන කාර්‍යබාරය වෙන්නෙ එන්ජිමේ නිපදවෙන කැරකුම් බලය පොලොවටත් සමග ඝර්ෂණ බලයක් ලෙස ලබාදී, වාහනය ගමන් කරවීමයි. එම නිසා ඔබේ රථයේ ටයරයේ ආයුකාලය, ආරක්ෂාව, ඉන්ධන කාර්‍යක්ෂමතාව කියන හැමදේම තීරණය වෙන්නෙ මෙමෙ ඝර්ෂණ බලයත් සමගයි.
සෑම ටයරයක්ම සෑදී තිබෙන්නෙ රබර්, කාබන්, ලෝහ ඇතුලු යම් සංඝටක වල එකතුවක් විදියටයි. නමුත් භාවිතා කරන කාර්‍ය, පරිසර තත්ව අනුව මෙම සංඝටක වල වෙනස්කම් සහ ටයරයේ කට්ට රටාව අනුවත් මෙමෙ ටයර් මාදිලි වෙනස් වීම සිදුවේ. පහත දැක්වෙන්නේ බහුල ලෙස භාවිතා වන ටයර් මාදිලියි.
ටයරයේ කට්ට රටාව (Tread Pattern)
ටයරයේ tread හෙවත් කට්ට රටාව අනුව ටයර් වර්ග තුනක් හඳුනා ගන්න පුළුවන්. ටයරයේ.. හෙවත් කට්ට රටාව අනුව ටයර් වර්ග තුනක් හඳුනා ගන්න පුළුවන්. පහත රූප සටහනේ එම ටයර් වල කට්ට රටාවේ සන්සන්දනයක් කර ඇත.
Symmetric tread, නැතිනම් සමමිතික කට්ට රටාව යනු ටයරයේ වම්පස සහ දකුණු පසත්, ඉදිරිපස සහ පසුපස, යන පැති වල ඒකාකාර කට්ට රටාවක් පවතින ටයර් මාදිලියි. පහත රූපය හොඳින් නිරික්ෂණය කලොත්, ටයරය පොලොව හා ගැටෙන පෘෂ්ඨය (contact surface) ඒකාකාරී වේ. මෙම ටයර් වල එක් වාසියක් වන්නේ, ටයරය ඕනම කැරකුම් අතකට (rotation direction) සවි කිරීමට හැකි වීමයි. මීට අමතරව මෙම කට්ට රටාව අඩු ප්‍රතිරෝධී බලයක් (rolling resistance) ඇති කරයි. එම නිසා ඉන්ධන පිරිමැසුම් දායක වේ.
Asymmetric tread, හෙවත් අසමමිතික කට්ට රටාව සහිත ටයරයක් දෙවනි රූපයේ දක්වා ඇත. මෙම ටයරයේ විශේෂත්වය වන්නේ ටයරයේ ඇතුලත කට්ට, මාර්ගයේ වතුර ඉවත් කරන ලෙසත්, පිටත කට්ට වංගු වලදී හොඳ ඝර්ෂණයක් ලබාදී වඩාත් ආරක්ෂාකාරී වීමයි. වැඩි වේගයක් සහිතව වංගු ඇති මාර්ගවල නිතරම ධාවනය කරන රථ වලට මෙම tread pattern සහිත ටයර් භාවිතා කරයි.
Unidirectional tread, හෙවත් දීශාගත කට්ට රටාවක් සහිත ටයරයක් තුන්වෙනුව දක්වා ඇත. මෙමෙ ටයරයේ V හැඩැති කට්ට රටාවක් ඇති අතර මෙම රටාව තෙතමනය සහිත මාර්ගවල උපරිම ඝර්ෂණය ලබාදීමට හේතුවේ. මීට අමතරව මෙම ටයරය මාර්ගයේ ධාවනය වීමේදී ඇතිවෙන ශබ්දය අවම කරයි.
මාර්ග තත්ව කට්ට රටාව (Terrain Type)
මාර්ග තත්වය අනුව ටයර් වල වර්ගීකරණය පහත දක්වා ඇත.
Highway tyres, මෙම මාදිලි (HT) නිපදවන්නෙ බහුලවම තාර ඇතිරූ මහමාර්ග වල, අධිවේගී මාර්ගවල ධාවනය සඳහායි. හොඳ ඝර්ෂණයක් මාර්ගය සමග ලාබා දෙන අතර, ඉන්ධන කාර්‍යක්ෂමතාව හෝ වේගය යන දෙකින් එකකට ප්‍රමුඛතාව ලබාදෙයි. ටයරයේ දැඩි ස්වභාවය වැඩිනම් ඉන්ධන පිරිමැසුම වැඩි අතර ටයරයේ නම්‍යශීලිතාව වැඩිනම් එය වේගය ප්‍රමුඛ කර ඇත.
All-terrain, මෙම ටයරය මහා මාර්ග සහ ඉන් පිටත ධාවයනය කියන කරුණු දෙකම සැලකිල්ලට ගෙන නිපදවා ඇත. (AT) ටයර් ලෙස කෙටියෙන් හඳුවන මෙම මාදිලියේදි යම් ගැඹුරු කට්ට රටාවක් සහ මාර්ගයේ වතුර ඉවත් වන ලෙස නිපදවා ඇත.
Mud terrain, මඩ ටයර් හෙවත් MT ලෙස හඳුන්වම මෙම මාදිලිය off-road ධාවනය සඳහා නිපදවා ඇත. වෙන් වෙන් කොටස් වශයෙන් කට්ට රටාව නිපදවා ඇති අතර. මෙහි අරමුණ වන්නේ මඩ, ගල් වැනි දේ මගහැර හොඳ ඝර්ෂණයක් ලබා දීමයි. ඔබ වාහනය වැඩිපුර ධාවනය වන්නේ, මහා මාර්ග සාමාන්‍ය ගුරු පාරවල් වලනම් මෙම ටයර් භාවිතය ඔබට සුදුසු නැත. මෙය සාමාන්‍යෙන් සුව පහසුව අඩු අතර, මිලෙන් වැඩි වීමට ඉඩ ඇත.
ටයරයේ ප්‍රමාණාත්මක මිනුම් (Tyre Size)
ඔබ දැක ඇති අංක තුනකින් පෙන්වා දෙන අගයක් හැම ටයරයකම තියෙනවා.එහි පෙන්වන්නේ ටයරයේ දිග පලල සහ උසට අදාල අගයන්. බොහෝ දෙනෙකුට තියෙන ගැටළුවක් තමයි, ටයර් සයිස් එක සහ ඒක අඩු වැඩි කරන්න පුළුවන්ද, එහෙම කලොත් එන වාසි අවාසි මොනවද කියන එක. පහත දක්වා ඇත්තේ ටයරයේ මූලික මිණුම් අගයන්.
ඉහත පෙන්වා ඇති පරිදි ඔබේ ටයරය ප්‍රධාන වශයෙන් රිම් ප්‍රමාණය (rim size) අනුව තීරණය වෙනවා.
මෙහි පලල (width) සහ ප්‍රොෆයිල් එක (profile) සඳහා උස ගණනය කරනු ලබන්නෙ මිලිමීටර් (mm) වලින්. එකම රිම් සයිස් එක සඳහා ඔබට පලල සහ ප්‍රොෆයිල් එක වෙනස් කිරීමෙන් ටයරයේ ප්‍රමාණය වෙනස් කර ගන්න පුළුවන්. මෙහිදී වැදගත්ම කරුණ වෙන්නේ එම අගයන් වැඩි කිරීම, වාහනයේ සෑම වේගයකදීම හැරවීමේදී බාධාවක් නොවිය යුතුයි. ප්‍රොෆයිල් එක වැඩි කිරීමෙන් ටයරයේ side wall උස වැඩි වීම නිසා වැඩි සුවපහසු ගමනක් ලබා ගත හැකි වන අතර අධිවේගී හැසිරවීම් වලදී වේගය සීමා වේ.
ටයරයේ නඩත්තුව
ටයරයේ නිසි නඩත්තුව එහි කල් පැවැත්මටත් ඔබේ ආරක්ෂාවටත් එක සේ වැදගත් වේ. මීට අමතරව ටයරය ඔබේ වාහනයේ suspension පද්ධතියේ ප්‍රධාන උපාංගයක් ලෙසත් ක්‍රියාත්මක වේ. එබැවින් නිසි නඩත්තුව වාහනේ suspension පද්ධතියේ කල්පැවැත්මට බෙහෙවින් උපකාරී වේ.
නිසිලෙස ටයරයක් භාවිතා කිරීමේ ප්‍රධානම අංගය වන්නේ නිසි හුලං පීඩනය පවත්වා ගැනීමයි. වැඩිපුර හුලං ගැසීමෙන් ටයරයේ මැද ප්‍රදේශය ගෙවීම වේගවත් වන අතර suspension පද්ධතියටද හානිදායක වේ. නමුත් බොහෝ දෙනෙක් වැඩිපුර හුලං ගසා කාලයක් එහි පීඩනය පරික්ෂා කිරීමෙන් වැලකී සිටිනවා මෙය ටයරයට අහිතකරයි. අපේ ඇහැට පේන මට්ටම ටයරයේ හුලං පීඩනය ගැන හරි නිගමනයක් නොදෙයි. මෙහිදී බොහෝ විට වන්නෙ, හුලං පීඩනය වැඩි නිසා මැද ගෙවී, හුලං පීඩනය අඩු වන විට දෙපස ගෙවීමට ලක්වීමයි. එබැවින් මාසයකට වරක්වත් හුලං පීඩනය බලා අලුත් කිරීම සිදු කල යුතුයි.
මීට අමතරව අනිත් වැදගත්ම කරුණ වන්නේ වාහනයේ .. නිසි ආකරයෙන් පවත්වා ගැණීමයි. මෙමගින් ටයරයේ අහඹු ලෙස එක් එක් පෙදෙස් වලින් ගෙවීයාම් වලක්වා ගත හැකියි.
ඉහත කරුණු ඔබටත් නිසි පරිදි ඔබට ගැලපෙන ටයරය තෝරාගෙන එහි නඩත්තුව හරි ආකාරයෙන් කරගෙන යාමට උපකාරීවේ යැයි අපි සිතනවා. මෙම දැනුම අන් අයත් සමගත් ශෙයාර් කරන්න අමතක කරන්න එපා.
|
ඔබේ මිතුරන්ටත් මේ ලිපිය වැදගත්වෙයි කියල හිතනවනන් පහලින් තියෙන සෝශල් මේඩියා බටන් වලින් ශෙයා කරන්න අමතක කරන්න එපා 🙂
|
ඔයාලත් වාහනයක් ගන්න හරි විකුණන්න හරි ඉන්නවනන් careka.lk එකෙන් ලේසියෙන් කිසිම අමත‍ර ගාස්තු නැතුව වැඩේ කරගන්න පුලුවන් – දැන්ම වෙනස බලන්න. CLICK HERE
