විදුලියෙන් දුවන වාහන අනාගතෙයේ තෙල් වාහන අභිබවයිද? Are electric vehicles the future ?

ඔබ දන්නවාද ලොව පුරාම තිබෙන තෙල් සංචිත තව අවුරුදු 53 කින් සම්පූර්ණයෙන් නැතිවී යන බව, ඉතින් විකල්පය විදුලියද ? අපි අද මේ ගැන කතා කරන්න බලාපොරොත්තු වෙනවා

ලොව සුපතල Bloomberg සමාගම විසින් නිකුත්කරන ලද නවතම වාර්තාවකට අනුව, වර්ෂ 2040 දී අලුත් වාහන අලෙවියෙන් 58% විදුලි බලෙන් දුවන වාහන බවට ප්‍රකාශ කරල තියනවා නමුත් එය ලොව පුරා ධාවනය වන වාහන වලින් 33% පමණ වෙනවා. ඉතින් තව අවුරුදු 20ක් ඇතුලත සිදුවන මේ වෙනස ගෝලීය වශයෙන් වාහන ව්‍යාපාරයට හා පොසිල ඉන්ධන ව්‍යාපාරයට අනිවාර්යයෙන්ම  විශාල බලපෑමක් සිදු කරන්න පුලුවන්.

ඒ වගේම එක්සත් ජනපදයේ ප්‍රසිද්ධ මොටර් රථ සඟරාවක් වනTop Gear පවසන පරිදි විදුලියෙන් ධාවනය කරන වාහන සඳහා වැයවන නඩත්තු වියදම, ඉන්ධන භාවිතයෙන් ධාවනය කෙරෙන වාහනයක් නඩත්තු කිරීම සඳහා වැයවන මුදලට වඩා අඩුයි, නමුත් එහි විශාල වෙනසක් නොවන බවයි ඒ අය කියන්නේ. 

විදුලි මෝටර් රථ වෙළඳපොළ 2019 දී අති විශාල දියුණුවක් අත්කරගනු ලැබුවා. මෝටර් රථ නිෂ්පාදකයින් විශාල සංඛ්‍යාවක් ඉදිරි වසර කිහිපය සඳහා වඩා විශාල සැලසුම් සකස් කරමින් සිටිනවා.

උදාහරණයක් ලෙස Rivian සමාගම ඩොලර් බිලියන 1.3 ක අමතර ආයෝජනයක් විදුලි වාහන සඳහා සිදුකරමින් වසර අවසන් කරනු ලැබුවා. Tesla සමාගම ලාභයක් ලබමින්, Cybertruck ආරම්භ කළ අතර ෂැංහයි කම්හලේ ඉදිකරන ලද පළමු මොඩ්ල් තුනට අමතරව, මොඩ්ල් S සහ මොඩ්ල් X ලෙස පරාසයන් පුළුල් කළා. සුඛෝපභෝගී විදුලි මෝටර් රථ ගැන විමසා බලන විට වෙළෙඳපොළට නිකුත් කරනු ලැබූ Audi E-Tron, නිෂ්පාදනය ආරම්භ කරන ලද Porsche Taycan සහ Lamborghini සමාගම විසින් නිවේදනය කරන ලද සිය පළමු දෙමුහුන් සුපිරි මෝටර් රථය කාගේත් අවධානයක් දිනාගත්තා.

The Wall Street Journal අනුව 2019 විද්‍යුත් වාහන සම්බන්ධ බොහෝ වර්ධනයන් සිදු වූ වසරක් වූ අතරම, එය පොරොන්දු රාශියකින් සමන්විත වසරක් ද වෙනවා. පසුගිය වසරේ අග භාගය වන විට මෝටර් රථ නිෂ්පාදකයින් නුදුරු අනාගතයේ දී නව විද්‍යුත් වාහන නිපදවීම සඳහා ඩොලර් බිලියන 225 ක් වැය කිරීමට පොරොන්දු වී ඇති බවත් ජර්නලය පවසනවා.

ලොව පුරා වායු විමෝචන සහ ඉන්ධන කාර්යක්ෂමතා පිළිබඳව නීති රෙගුලාසි ඉතා දැඩි වෙමින් පවතින කාලයක මෝටර් රථ නිෂ්පාදකයින්ට එම සීමාවන්ට සරිලන පරිදි වාහන නිපදවීමට බල කිරීමක් හා ප්‍රීඩනයක් එල්ල වෙනවා. ඒ අනුව මෑත වසරවලදී නිෂ්පාදකයින් වැඩි EV/ Electric Vehicle (විද්‍යුත් වාහන) ප්‍රමාණයක් වෙළඳපොළට ගෙන ඒම සඳහා සැලසුම්, කාල නියමයන් හා ප්‍රචාරයන් ආරම්භ කර තිබෙනවා.

එක් එක් සමාගම්වලට මේ ගැන ඇති අනාගත සැලසුම් ගැන අපි විමසා බලමු.

 

  • Toyota

 

BZ EV

රොයිටර් පුවත් සේවයට අනුව ටොයෝටා සමාගම වර්තමානයේ ගෝලීය හයිබ්‍රිඩ් වාහන වෙළඳපොළෙන් 80% කට වඩා වැඩි ප්‍රමාණයක් නිපදවා තිබෙනවා. ටොයෝටා සමාගමේ සැලසුම වන්නේ 2025 වන විට තමන්ගේ විකුණුම් වලින් 50%ක් විදුලි වාහන මඟින් උපයා ගැනීමයි. ඔවුන්ගේ පෙර තිබු සැලැස්ම වුණේ මෙම ඉලක්කය 2030 වන විට සපුරා ගැනීමයි. ටොයෝටා සමාගම දැනටමත් තමන්ගේම බැටරි නිපදවීමේ නිරත වුවත්, ඔවුන් චීන බැටරි නිෂ්පාදකයින් සමඟ හවුල් වී මෙම ඉල්ලුම සපුරාලීමට කටයුතු කරමින් සිටිනවා

 

  • Volkswagen Group 

ID4 EV

2023 වන විට ඩොලර් බිලියන 30 කට වඩා වැඩි මුදලක් EV සංවර්ධනය කිරීමට වැය කරන බව වෝක්ස්වැගන් සමාගම පවසනවා. 2030 වන විට සිය ගෝලීය නිෂ්පාදන සමූහයෙන් 40% ක් EV බවට පත් කිරීම සඳහා ඔවුන් අරමුණු කරගෙන සිටිනවා. මේ අතර 2023 වන විට වොක්ස්වැගන් විදුලි මෝටර් රථ මිලියනයක් නිෂ්පාදනය කිරීමේ ඉලක්කය කරා ළඟා වීමට සැලසුම් කර ඇති අතර එය කලින් අනාවැකි පළ කළ කාලයට වඩා වසර දෙකක පූර්ව ඉලක්කයක්.

 

  • General Motors

 

Hummer EV

2019 දී ජෙනරල් මෝටර්ස් පැවසුවේ විදුලි වාහන සම්බන්ධයෙන් කතා කිරීමේදී  “Cadillac” එහි ප්‍රමුඛතම වෙළඳ නාමය වනු ඇති බවයි. කැඩිලැක් සභාපතිවරයා පැවසුවේ 2030 වන විට සිය වෙළඳනාමයේ නිෂ්පාදන බහුතරයක් විදුලි බලයෙන් යුක්ත වනු ඇති අතර ඒ වන විට නිෂ්පාදන සියල්ලම සම්පූර්ණයෙන්ම විදුලි බලයෙන් ක්‍රියා කරන වාහන බවට පත්වීමේ හැකියාවක්ද පවතින බවයි. 2023 අග භාගයේදී කැඩිලැක් එස්කැලේඩ් වැනි විදුලි SUV රථයක් නිපදවීමට අපේක්ෂා කරන බව ඔහු තහවුරු කළේය.

 

  • Ford

 

Mustang Mach E

පසුගිය වසරේදී ෆෝඩ් විසින් Mustang Mach-E නමින් සිය අනන්‍යතාවය වූ ස්පෝර්ට්ස් කාර් රථයේ අලුත් සංස්කරණයක් එළි දැක්වූවා. නමුත් ෆෝඩ් EV වෙනුවෙන් සැලසුම් තිබූ එකම වාහනය එය පමණක් නොවේ. 2018 දී ෆෝඩ් හි ප්‍රධාන විධායක නිලධාරියා පැවසුවේ විදුලි මෝටර් රථ සඳහා වැඩි ආයෝජනයක් සිදු කිරීමෙන් 2022 වන විට විදුලි හා විද්‍යුත් මාදිලි පෙළගැස්මක් ඇති වන අතර එයට වාහන 40 ක් ඇතුළත් වන බවයි.

2019 දී Ford Europe සමාගම සිය අනාගත මාදිලි සඳහා විද්‍යුත් විකල්පයන් ලබා දෙන බව පැවසූ අතර Detroit Auto Show හීදී නිවේදනය කළේ සම්පූර්ණ විදුලි බලයෙන් ක්‍රියාකරන F -150 මාදිලිය ඉදිරි වසරවලදී නිකුත් කරන බවයි. 

 

  • Volvo 

XC 40

පසුගිය වසරේදී වොල්වෝ සිය පළමු විදුලි වාහනය වන XC40 Recharge එළිදැක්වූවා. 2020 සිව්වන කාර්තුවේදී එක්සත් ජනපදය තුළ මෙය අලෙවි කිරීමට ඔවුන් අපේක්ෂා කරනවා. වොල්වෝ සමාගම 2025 වන විට සිය ගෝලීය විකුණුම් වලින් 50% ක් EV වලින් ජනනය කරන බවට පොරොන්දු වූ අතර එම වසර වන විට නිෂ්පාදනය කරන සෑම වාහනයකම සමස්ත කාබන් පා සටහන් (carbon footprint) 40% කින් අඩු කරන බවටද පොරොන්දු වුණා.

එමෙන්ම වොල්වෝ සමාගම ඉදිරි වසර පහ සඳහා සෑම වසරකම නව EV එකක් නිකුත් කරන බව ප්‍රකාශයට පත් කළා. 2040 වන විට පූර්ණ දේශගුණික උදාසීන ආයතනයක් වීමට ස්වීඩන් ජාතික සමාගම සැලසුම් කරනවා.

 

  • Honda

 

E City

හොන්ඩා සමාගම සිය හොන්ඩා E city මෝටර් රථය 2019 දී එළිදැක්වූ අතර 2022 වන විට යුරෝපයේ විකුණන සෑම මාදිලියක්ම අඩුම තරමින් අර්ධ වශයෙන් විදුලියෙන් ක්‍රියා කරන වාහන බවට පත් කරන බවද කියා සිටියා. සමාගම විසින් කලින් කරන ලද පුරෝකථනයන් ඉක්මවා යමින් 2025 වන විට හොන්ඩා විසින් සම්පූර්ණ විදුලි බලය සහිත මෝටර් රථ පෙළක් ඉදිරිපත් කිරීමටත් පොරොන්දු වී තිබෙනවා. එක්සත් ජනපද පාරිභෝගිකයින්ට ගැළපෙනු ඇතැයි සැලකෙන පූර්ණ විදුලි Honda E සහ hybrid Jazz මෙම වැඩසටහනේ මූලික අදියරයන් වෙනවා.

 

  • BMW Group 

i3 EV

2017 දී BMW සමාගම විසින් පුරෝකථනය කරන ලද්දේ විද්‍යුත්කරණය කළ වාහන (සම්පූර්ණ විදුලි වාහන නොවේ) මඟින් 2025 වන විට එහි විකුණුම් වලින් 15% සිට 25% දක්වා ප්‍රමාණයක් වනු ඇති බවයි.

එම ඉලක්කය ළඟා කරගැනීමේ අදියරක් ලෙස BMW සමූහය පසුගිය වසරේදී Electric Mini Cooper SE එළිදැක්වූ අතර එය “නාගරික සංචලතාව” (Urban Mobility) ඉලක්ක කර ගෙන ඇත. ජූනි මාසයේදී BMW සන්නාමය පැවසුවේ මුලින් සැලසුම් කළ කාලයට වඩා දෙවසරකට පෙර, එනම්  2023 වන විට විද්‍යුත් වාහන මාදිලි 25 ක් නිපදවන බවයි. එම නව මාදිලි වලින් එකක් ලෙස 1 Series Hatchback විද්‍යුත් අනුවාදයක්, 2021 තරම් ඉක්මනින් පැමිණිය හැකි බවත් තවදුරටත් පැවසුවා.

2019 හා සසඳන විට 2021 සිට 2025 වන විට විදුලි වාහන අලෙවිය දෙගුණයකින් වැඩි කිරීමට සහ එය 30% කින් වර්ධනය වනු ඇතැයි BMW සමාගම අපේක්ෂා කරනවා.

 

  • Nissan 

Leaf plus

නිසාන් සමාගම පසුගිය වසරේදී දිගු පරාසයක් සහිත “Leaf Plus” මෝටර් රථය හඳුන්වා දුන් අතර 2022 වන විට නව විදුලි මෝටර් රථ 8ක් හඳුන්වා දීමට සැලසුම් කර තිබෙනවා.

පසුගිය වසරේ ටෝකියෝ මෝටර් රථ ප්‍රදර්ශනයේදී එම සමාගම සිය නව Ariya EV සංකල්පය එළිදැක්වූ අතර, පසුගිය වසරේ අගභාගයේදී එම සමාගම වාර්තා කළේ මෙම සංකල්පයේ නිෂ්පාදන සංස්කරණයක් 2021 වන විට එක්සත් ජනපදයට හඳුන්වා දිය හැකි බවයි. ඉහළ කාර්යසාධනයක් සහිත මේ මාදිලි මඟින් එක් වරක් චාර්ජ් කිරීමෙන් සැතපුම් 300 ක් ගමන් කළ හැකි බව වගේම පැයට සැතපුම් 0 සිට 60 දක්වා වේගයක් තත්පර පහකට අඩු කාලයක් තුළ ලබාගත හැකි බවත් නිසාන් සමාගම පවසනවා.

 

  • Fiat Chrysler Automobiles 

RAM

2018 දී ෆියට් ක්‍රයිස්ලර් සමාගම නිවේදනය කළේ 2022 වන විට ඩොලර් බිලියන 10.5 ක් විද්‍යුත්කරණය සඳහා ආයෝජනය කරන බවයි. එම වසර වන විට අවම වශයෙන් දෙමුහුන් හා සම්පූර්ණ විදුලි බල සැපයුම් මාදිලි 12 ක් ඉදිරිපත් කිරීමටත් විද්‍යුත්කරණය කළ මාදිලි 30 කට වැඩි ප්‍රමාණයක් දියත් කිරීමටත් FCA සමාගම සැලසුම් කරනවා. එම ප්‍රයත්නයේ කොටසක් ලෙස සමාගම විසින් පසුගිය වසරේදී නව සහ පවත්නා කර්මාන්තශාලා සඳහා ඩොලර් බිලියන 4.5 ක ආයෝජනයක් ප්‍රකාශයට පත් කළ අතර එමඟින් අවම වශයෙන් ප්ලග්-ඉන් දෙමුහුන් ජීප් මාදිලි හතරක්වත් නිෂ්පාදනය කිරීමට ඉඩ සැලසෙනු ඇත.

Consumer Electronics ප්‍රදර්ශනයේදී Compass, Renegade සහ Wrangler මාදිලිවල ප්ලග්-ඉන් දෙමුහුන් සංස්කරණ ප්‍රදර්ශනය කිරීමෙන් FCA සිය පොරොන්දුව ඉටු කරන බවට ඉඟි පළකළා.

 

  • Daimler 

AMG EQS

මර්සිඩීස් බෙන්ස් හි මව් සමාගම වන ඩේම්ලර් විසින් 2022 වන විට EV වාහන 10 කට වැඩි ප්‍රමාණයක් හඳුන්වා දීමේ අරමුණින් ඩොලර් බිලියන 11 කට වැඩි ප්‍රමාණයක් සිය EV විදුලි මෝටර් රථ නිපදවීම සඳහා සැලසුම් 2017 දී එළිදක්වන ලදී. අවම වශයෙන් සෑම මර්සිඩීස් බෙන්ස් සීරීස් එකකින්ම එක් විදුලි විකල්පයක් ඉදිරිපත් කිරීමටත් ඔවුන් බලාපොරොත්තු වෙනවා. සම්පූර්ණයෙන්ම විදුලිබලයෙන් ක්‍රියාත්මක වන G-Wagen මාදිලියේ වැඩ කටයතු සිදු කරමින් සිටින බව ඩේම්ලර් පසුගිය වසරේදී තහවුරු කළා.

Sources – Topgear – Bloomberg

|

ඔබේ මිතුරන්ටත් මේ ලිපිය වැදගත්වෙයි කියල හිතනවනන් පහලින් තියෙන සෝශල් මේඩියා බටන් වලින් ශෙයා කරන්න අමතක කරන්න එපා 🙂

|

ඔයාලත් වාහනයක් ගන්න හරි විකුණන්න හරි ඉන්නවනන් careka.lk එකෙන් ලේසියෙන් කිසිම අමත‍ර ගාස්තු නැතුව වැඩේ කරගන්න පුලුවන් – දැන්ම වෙනස බලන්න. CLICK HERE

Leave a Reply

Your email address will not be published. Required fields are marked *