කාර් එකේ බැටරිය මාරු කරන්න ඕනේ වෙන්නේ මොන වගේ වෙලාවටද ?

කාර් එකේ බැටරිය මාරු කරන්න ඕනේ වෙන්නේ මොන වගේ වෙලාවටද ?


කාර් එකක බැටරිය කියන්නේ හරියට අපි ආශ්වාස කරන ඔක්සිජන් වගේ දෙයක්. නැතුවම බැරි දෙයක් උනාට ඉතාම කලාතුරකින් තමයි අපේ අවධානය යොමු වෙන්නේ. බැටරිය බිංදුවටම බැහැලා වාහනේ ස්ටාර්ට් කරගන්න බැරිම තත්ත්වයකට පත් වෙලා අපි අපහසුතාවයට පත්වුණ වෙලාවට තමයි බැටරිය කොච්චර වැදගත්ද කියලා අපිට මතක් වෙන්නේ. වාහන හිමියන්ගෙන් ගොඩ දෙනෙක්ට බැටරියේ තත්ත්වය කොයි වගේද කියලා චෙක් කරන විදිය ගැන නිවැරදි තේරුමක් නැහැ. 



ගැරෑජ් එකකට සතියකට මේ වගේ අකරතැබ්බවලට මුහුණ දෙන වාහන කීයක් එනවද කියලා ඔබ දන්නවා නම් පුදුමයට පත් වේවි. සමහර වාහනවල බැටරිය බිංදුවටම බැහැලා. තව සමහර වාහනවල බැටරි ආයෙත් පාවිච්චි කරන්න බැරි විදියටම නරක් වෙලා. පුදුම වැඩේ කියන්නේ මෙහෙම අරන් එන වාහනවලින් ගොඩක් වාහන පිටින් අඳුරගන්න පුලුවන් කිසිම සංඥාවක්වත් නැතුව තමයි බැටරිය බැහැලා තියෙන්නේ. මේක තමයි ගොඩක් මෝටර් රථ හිමියන්ට බැටරිය බැහැලා කියලා අඳුරගන්න බැරි හේතුව. බැටරිය මාරු කරන සහ චාර්ජ් කරගන්න ඕන වෙලාවල් හරියට දැනගන්න පුලුවන් සරල ක්‍රම කිහිපයක් අපි අද ඔබ වෙත අරන් එනවා.


1. නිසිකලට කාර් එක සර්විස් කරන්න



මේක නම් අමුතුවෙන් කියන්න ඕනේ දෙයක් නෙමෙයි. ඒත් හරි ප්ලෑන් එකකට ස්ථාවර පිළිවෙළකට කාර් එක සර්විස් කරන එකෙන් කාර් එකේ බැටරිය අවුල් වෙලා මඟ නවතින සම්භාවිතාවය අඩු වෙනවා වගේම බැටරියේ ආයු කාලයත් වැඩි වෙනවා. ලෙඩ තියෙන කොටස් නිසා අනිසි විදියට බැටරිය පාවිච්චි වෙද්දී බැටරිය ඉක්මණින් බහිනවා. ඒ වගේම වාහන ගැන වෘත්තීමය අත්දැකීම් තියෙන අයට බැටරියේ ලෙඩක් තියෙනවද, තියෙනවා නම් ඒකට හේතු මොනාද කියලා ලේසියෙන් තිතටම අඳුරගන්න පුලුවන්. 


2. ඩෑෂ්බෝර්ඩ් අනතුරු ඇඟවීම් !



ඔයාගේ වාහනේ ඇත්තටම බැටරියේ අවුලක් තියෙනවා නම් ඔයාට ඉඟි දෙනවා. පළවෙනිම එක තමයි ඩෑෂ්බෝර්ඩ් එකෙන් දෙන අනතුරු ඇඟවීම. කාර් එක ස්ටාර්ට් කරන හැම වෙලාවෙම ඔයාගේ ඩෑෂ්බෝර්ඩ් එකේ ලයිට් එළිය අඩු වෙවී වැඩි වෙනවා නම් ඉක්මණටම බැටරිය චෙක් කරගන්න එක ඇඟට ගුණයි. කාර් එක ස්ටාර්ට් වෙන්නෙ හෙමීට නම් ඒකට හේතුව වෙන්නෙත් අඩු ධාරිතාවයක බල සැපයුම. හොඳටම චාර්ජ් උන බැටරියක් දාලා තිබ්බත් මෙහෙම වෙන්න පුලුවන්. ඒත් 90% ක්ම මෙහෙම වෙන්නේ බැටරියේ ප්‍රශ්න තියෙනව නම් තමයි. 


3. වාහනයේ වර්ගය


නවීන වාහනවල එන ෆීචර්ස් ඉතාම වැඩියි. මේක මෝටර් රථ හිමියාට හිතකර සුවපහසු දෙයක් කියලා හිතුවට එහෙම නොවෙන අවස්ථාවන් නැතුවම නෙමෙයි. සමහර අලුත්ම වාහනවල පරිඝනක, කෘත්‍රිම බුද්ධිය වගේ නවීනතම තාක්ශණික අංග අඩංගු වෙනවා. හැබැයි මේ හැමදේකටම බලය ලබාගන්නේ බැටරියෙන්. කාර් එකේ එන්ජින් එක ඕෆ් කරලා තිබ්බත් හැමවෙලාවෙම වැඩ කරන උපාංගත් තියෙනවා. ඔයත් පාවිච්චි කරන්නේ හෝ කරන්න බලාපොරොත්තුවෙන් ඉන්නේ මේ වගේ වාහනයක් නම් සුමානෙකට සැරයක්වත් බැටරිය චාර්ජ් කරගන්න එක හොඳ පුරුද්දක්.ඒකට කරන්න තියෙන්නේ අඩුම ගානේ විනාඩි 20කට වඩා වැඩි ගමනක් ඔබේ වාහනෙන් යන එක.එතකොට වාහනේ බැටරිය යලි චාර්ජ් වෙනවා.එහෙම ගිහිල්ලත් චාර්ජ් වෙන්නේ නැත්තන් ඔබේ වාහන සුදුසුකම් ඇති තැනකින් චෙක් කරගන්න එක නුවණට හුරුයි.


4. අඩු උෂ්ණත්වය   


ලංකාවේ හැමෝටම මේ ප්‍රශ්නේ නැති උනත් ඔබ ඉන්නේ සීත දේශගුණයක් තියෙන පැත්තක නම් සීතල කාලගුණයයි වාහන බැටරියයි කියන්නේ එකිනෙකට පෑහෙන්නේ නැති දේවල් දෙකක්. සීතලට ඔයාගේ කාර් එකේ බැටරියේ ප්‍රශ්න එනවද? සාමාන්‍යය පිළියම නම් කාර් එක ස්ටාර්ට් කරල විනාඩි කිහිපයක් නියුට්‍රල් එකේ තියෙන එක. එහෙම කරත් වැඩේ හරියන්නේ නැහැ වගේ නම් බැටරිය පෙන්නන්න වෙනවා. 


5. බැටරිය අවුල්ද? හඳුනාගත හැකි ක්‍රම !


  • රාත්‍රී කාලයක හෙඩ් ලයිට් ඔන් කරලා එන්ජින් එක ස්ටාර්ට් කරලා බලන්න. ස්ටාර්ට් වෙද්දී හෙඩ් ලයිට් ඩිම් වෙනවා නම් ඔයාගේ බැටරිය හරිම විදියේ මට්ටමකින් වැඩ කරන්නේ නැහැ. අපි ඩෑෂ්බෝර්ඩ් එක ගැන කලින් කියපු ටිප් එකත් මේ වැඩේට පාවිච්චි කරන්න පුලුවන්.

  • වාහනේ ස්ටාර්ට් කරද්දි “Tukt tuk tuk” වගේ අමුතු සද්දයක් එනවද? ඒත් එක පාර ස්ටාර්ට් වෙන්නේ නැද්ද? ඒකෙන් කියවෙන්නෙත් වාහනේ බැටරියේ ප්‍රශ්නයක් තියෙනවා කියන එක. නිතරම මෙහෙම වෙනවා නම් පුලුවන් තරම් ඉක්මණට බැටරිය පෙන්නන්න. නැත්නම් වෙන්නේ බැටරිය ඩෙඩ් වෙලා වාහනේ ස්ටාර්ට් වෙන්නෙම නැති වෙලාවක් එනකන් ඉඳලා අමාරුවේ වැටෙන එක. 

  • මීට අමතරව බැටරියේ ලීක් එකක් පෙන්නුම් කරනව නම් වාහනේ ස්ටාර්ට් නොවී තිබේන්නත් පුලුවන්.එවගේම බැටරි කේස් එකට හානි වෙන තරමේ උෂ්ණත්වයකට බැටරිය පත්වෙනවා නම් එතනදිත් ඔබේ බැටරිය පරීක්ෂා කරගන්න වෙනවා.මේ වගේ තත්ව වලදී අනිවාර්යෙන්ම දැනුමැති වෘත්තිකයෙකුගේ උපදෙස් ලබාගන්න.හැබයි ඉතින් වෘත්තීමය උපදේශන ගන්න යන්න කලින් මේ බැටරි අග්‍ර දෙක සම්බන්ධ වෙන කේබල් දෙක හොඳින් බැටරියට සම්බන්ධ වෙනවද කියන එකත් හොඳින් චෙක් කරලා බලන්න.විශේෂයෙන්ම + සහ - අග්‍ර අතර ඔය පහල පින්තුරේ තියෙනවා වගේ බැඳිලා තියෙන දේවල් ඉවත් කරන්න නම් උණුසුම් වතුර හොඳටම ඇති.එ ගැන සම්පූර්ණ විස්තරයක්ම අපි ඊලඟ ලිපි වලින් පලකරන්න බලාපොරොත්තු වෙනවා.



වාහනේ නියුට්‍රල් එකේ තියෙද්දී හෙඩ්ලයිට්ස් ඔන් කරන්න. ඊටපස්සේ ටික ටික රේස් කරන්න. රේස් කරන්න කරන්න ලයිට් එළිය වැඩි වෙනවා නම් බැටරිය මාරු කරන්න කාලේ ඇවිල්ලා වෙන්න පුලුවන් කියන එක තමයි ඒකෙන් කියවෙන්නේ. ඔයාට කොච්චර වාහන ගැන අත්දැකීම් තිබ්බත් හැමවෙලාවෙම හොඳම දේ තමයි වෘත්තිකයෙකුටම දීලා වාහනේ චෙක් කරගන්න එක. විශේෂයෙන්ම බැටරිය ගැන ප්‍රශ්නවලදි හොඳම සහ අපි ඔබට දෙන උපදෙස තමයි ලෙඩක් අඳුනගත්‍ත ගමන්ම සහ කාලෙකට සැරයක් මේ සම්බන්ධ වෘත්තිකයෙකුටම දීලා වාහනේ චෙක් කරගන්න. 



  • මීට අමතරව බැටරිය රීචාර්ජ් වෙනකොට බැටරියට යන කරන්ට් එක සපයන කරන ඕල්ටර්නෙටර් එකෙ අවුලක් උනොත් බැටරියට හානි වෙන්න,එකේ ජිවිත කාලය අඩුවෙන්න පුලුවන්.ගොඩක් වෙලාවට මේ හින්දා වෙන්නේ අනවශ්‍ය ප්‍රමානයට ඔවර්චාර්ජ් වීමක් වෙලා බැටරිය අධික උෂ්ණත්වයකට පත්වෙන එක.එක අනිවාර්යෙන්ම වෘත්තීමය දැනුමැති කෙනෙක්ගෙන් හදාගන්න වෙනවා.

  • අනෙක් දේ තමයි ඔබේ මෝටර්රථයේ කොහේ හරි ශොර්ට් සර්කිට් තත්වයක් තිබුනොත් බැටරිය ඉතා ඉක්මනින් අවසන් වෙන්න පුලුවන්.එ නිසා බැටරිය ඉක්මනින් අවසන් වීම බැටරියේම ප්‍රශ්නයක් කියලා ඉක්මන් තීරණයකට එලඹෙන්න එපා.


  • ලිපිය ඉවර කරන්න කලින් පොඩි ටිප් එකක්, ඔබේ වාහනේ භාවිතා කරන්නේ විනාඩි 20කටත් අඩු කාලයක් ඇති ගමන් බිමන් යන්න නම් අන්න ඒදේ ඔබේ බැටරියට අහිතකර වෙන්න පුලුවන්.හේතුව බැටරිය හරියට චාර්ජ් වෙන්න එ කාලය මදි නිසා.මීට අමතරව ඔබ දන්න වෙනත් ක්‍රම හෝ කාර් බැටරිය සම්බන්ධව අපේ ලිපියෙන් මඟහැරුණු විශේෂ කරුණු තිබෙනවා නම් කමෙන්ට් කරලා හැමෝම දැනුවත් කරන්නත් අමතක කරන්න එපා.



මේවගේ තවත් Article කියවන්න පිවිසෙන්න - https://www.careka.lk/news/category